អន្តរជាតិ៖ យោងតាមរបាយការណ៍របស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនឱ្យដឹងថាគិតត្រឹមថ្ងៃទី២៧ ខែកុម្ភៈ ឆ្នាំ២០២២ ពលរដ្ឋអ៊ុយក្រែនចំនួន ៣៦៧ ៨៩៣នាក់ បាននាំគ្នាភៀសខ្លួនចេញពីប្រទេសរបស់ពួកគេខណៈដែលរុស្ស៊ីបើកការវាយប្រហារពីភាគខាងកើតមក។
អ្នកភៀសខ្លួនទាំងនោះធ្វើដំណើរភាគច្រើនទៅប្រទេសប៉ូឡូញដែលមានចំនួន ១៥៦ ៣០០នាក់ ប្រទេសហុងគ្រី ៧១ ១៥៨នាក់ ប្រទេសរ៉ូម៉ានី ៤៣ ១៨៤នាក់ ប្រទេសម៉ូលដូវ៉ា ៤១ ៥២៥នាក់ ប្រទេសស្លូវ៉ាគី ១៧ ៦៤៨នាក់ ប្រទេសបេឡារុស ២៦៣នាក់ និងឡាទ្វីមាន ១៦៣នាក់ និងប្រទេសផ្សេងទៀតចំនួន ៣៧ ៦៥២នាក់។
ការភៀសខ្លួនរបស់ពលរដ្ឋអ៊ុយក្រែនធ្វើឡើងតាំងពីថ្ងៃទីព្រហស្បត្តិ៍សប្ដាហ៍មុនដែលជាការវាយប្រហារដំបូងរបស់រុស្ស៊ីលើប្រទេសអ៊ុយក្រែនមកម្លេះ។ មនុស្សស្រី និងកុមារបានភៀសខ្លួនខ្លួនជាបន្តបន្ទាប់ ខណៈបុរសដែលមានអាយុពី១៨ ដល់៦០ឆ្នាំ ត្រូវនៅក្នុងប្រទេសដើម្បីប្រឈមនឹងការវាយលុករបស់រុស្ស៊ី៕
